GOITIA ETA OLHARAN, FINAL 4-ERAKO AUKERARIK GABE!
Lekeitio Master Series finala
GOITIA-ATAIN vs ERKIAGA-LEKERIKA: 11-15, 9-15
Pau Cup, final 1/2
OLHARAN-BASQUE vs BARANDIKA-PORTET: 13-15, 13-15
Aritz Erkiagak eta Unai Lekerikak irabazi dute Lekeitioko Master Seriesa. Frontoia gainezka zela, bi set eta huts irabazi diete (11-15, 9-15) euren aurkari markinarrei. Porrot honekin, Final Four-erako aukerarik gabe geratu da Alex Goitia eta gauza bera gertatu zaio Pauen, Jean Olharani ere. Laduchen eta Johanen artean erabakiko da beraz, Donostiako Final Four-erako jakiteko geratzen den azken plaza.
Lekeitiokoa izan Liga erregularrean denboraldiko azken txapelketa Hegoaldean. Goitiak eta Atainak, biek ematen diote pilotari gogorrago Erkiagak eta Lekerikak baino. Baina azken hauek ofizio gehiago dutela erakutsi dute. Beteraniak, esperientziak ematen duen jakintza eta huts gutxi egiten dituzte. Oso gutxi. 4-2 eta 5-4 hasi dira markinarrak markagailuan aurretik. Ahal izan duenean, Goitiak ondo asmatu du sake errestoan, hormabikoarekin. Atsedenaldirako ordea, Erkiaga eta Lekerika aurretik izan dira jada (7-8). Beste batzuk beldurra izaten duten arren, Lekerika eroso, gustora sentitzen da erreboteko paretaren aurka. Pilota guztiak sartzen ditu eta Lekeitio bezalako frontoietan, ondoren, eskuina atera eta tanto egin. Ispasterko maisuak ere ondo errematatu du eta lau tantugatik irabazi dute lehen jokoa. Azkena, Lekerikaren eskuinkada (11-15).
Bigarren jokoan, ondo hasi da Atain. Errebesarekin eta eskuinarekin, biekin jotzen dio gogor pilotari eta Goitiak ere sasoiz zuzendu du, saketik egin duen hutsa: Horma-bikoa atera du, Erkiaga zain-zain zegoen, Ispasterkoa aire sartu, hormabikoa bota eta bere oin azkarrei esker, Goitia iritsi egin da eta sareraren kontra, errematatzea lortu du (6-4). Baina Goitiak eta Atainek huts gehiegi egin dituzte eta piloteoan, bikote horia izan da nagusi. 6-8 aurretik jarri eta aldea handitu besterik ez dute egin. Polita 7-10eko tantoa: Lekerikak errebotea lurrera botata eraman, Goitia sartu eta txulara bota du, perfekto. Pilotak ez du jaikirik ere egin. 9-13koan ere, eskuinez bikain mugitu du pilota markinarrak, goitik behera jaiki edo bote handia emanaraziz. Detaile honak izan dira, baina erregulartasunik gabeak. Urtea joan, urtea etorri, Erkiaga da Lekeitioko Master honetako irabazle nagusia, eta txapa gaineko eder batekin amaitu du partida (9-15).
Dagoeneko Donostiako Final Four-a dute pilotariek buruan eta partida bakarra geratzen da Ligako sailkapena ixteko. Pauen irailaren 4ean jokatuko den finala:
LADUCHE-MANCI vs BARANDIKA-PORTET
Laduchek partida hori irabazten badu, Donostiako zita garrantzitsuan izango da. Galduz gero, Johan Sorozabal sailkatuko da.
Aurkezpena irailaren 9an izango da eta Barandika, Erkiaga, Urreisti, Basque, Gorka, Lekerika eta Manci han izango dira. Zein izango da 8. pilotaria? Datorren ostiralean jakingo dugu.
