Urriak 21, 19:00tan (ETB 1, 22:20tan)
Ezkurdi, Durango
FINAL HANDIA
Urreisti-Lekerika vs Urrutia-Del Rio
JOHAN-GORKA vs BARANDIKA-LOPEZ
Badator Jai Alai League-ko final handia. Denboraldiko titulu gorena, Pilotari onenen arteko azken fasean erabakitzen dena. Johan eta Gorka Sorozabal, Barandika eta Lopezen aurka. Sare sozialetako inkestetan eta kaleko pilota solasaldietan azken hauek dira faborito. Jai Alai News-eko jarraitzaileen artean, lautik hiruk uste dute bikote beteranoak irabaziko duela finala. Faborito dira bai. Baina hain argi? Arrisku handiko partidua dute Xabik eta Imanolek eta «Txik Txak» podcast-eko solasaldian adibidez, iritziak erdi eta erdi banatuta zeuden.
Egia esate aldera, Lopez-entzat Ezkurdi pilotaleku oso egokia da gaur egun. Duela urte batzuk frontoi luzea nahiago izango zuen. Bere boterea nabarmenago igartzen, oso erraz heltzen zen atzera, eskuinarekin ere pilota indartsu ateratzen zuen. Orain, pilotari beterano baten bilakaera naturala izan du eta puntu honetan, Ezkurdi frontoi erosoa da Lopezentzat. Espazio gutxiago kubritu behar du, boterea jeitsita, erraz heldu daiteke atzera esku biekin eta garrantzitsuena: pilota sartzeko duen erraztasun ikaragarriak, bote-pronto eta punpa-gora (bote-corrido) duen gaitasunak eta bere errebote bikainak, ahulezia oso gutxirekin uzte dunte kantxan.
Horrez gain eta «Noticias» taldean esan duen bezala, beterano izate horrek partiduen irakurketa eta lidergoa hartzen erakutsi diote. Pisuz, agian, sekula baino bajuago eta esperientziadun aurrelari on batek lagunduta, Barandikak eta Lopezek «ofizioa» ondo ikasia dute. Momentu zailetarako, oso garrantzitsua.
Barandika ere, oso entxufatuta eta maila oso altuan ikusi genuen lehengo astelehenean. Baina zerbait aurka izatekotan, presioa aipatu beharko genuke. Erkiaga eta Basqueri irabazita, txapela lortzera «presionatuta» daude. Guztiz kontrako egoera da, Johan eta Gorka Sorozabal anaiena.
22 eta 23 urte dituzte, pilotan oraindik dena egiteko baina onenen aurka lehiatzen hasiak dira. Gaztetasunak akats gehiago egitera daramatza baina sarearen beste aldean izango dute Laurent aitaren laguntza. Final Four-eko finalerdian bezala, Johan errematatzen ikustea espero dugu. Piloteorako aurkari txarrak ditu eta aurreko koadroetan arriskatu beharko du, Laduche eta Del Rioren aurka egin bezala. Biarritzko aurrelaria pilotari «luzea» da eta espazio handiagoetan moldatzen da ondoen. Hala ere, Ezkurdin lehengo astean egindako lehenengo setak eta «Txik Txak» podcastean Lujanbiok esan bezala, Erkiagari iaz Ezkurdin irabazitako buruz buruko partiduak, konfiantza eman behar lioke Johani. Gorka anaia duela hilabete batzuk baino erosoago dago eta ez dezagun ahaztu Ligako egungo txapelduna dela (Erkiagarekin irabazi zuen iaz).
Anaia bien arteko konexioa erabatekoa da eta ia jaiotzatik dator. Barandikak eta Lopezek berriz, ez dute ezkutatzen euren arteko hartu-eman ona. Elkarrekin jokatzea gustatzen zaie.
